PS, ora e provës
Si pasojë e situatës së krijuar në gjirin e PS, ekzistenca e një fraksioni në kuptimin e mirëfilltë të fjalës është bërë një domosdoshmëri.
Madje, momenti i tanishëm mund të thuhet se është ideal që lëvizja fraksioniste të fitojë terren me shpejtësi. Duke pasur parasysh se pas pak javësh zhvillohen zgjedhjet në parti, ideatorët e fraksionit kanë rastin të shfrytëzojnë fushatën e zgjedhjeve për të shpallur idetë e tyre duke shfrytëzuar pakënaqësinë e krijuar në bazë si pasojë e hapave të Nanos për spostimin e partisë djathtas. Në të vërtetë, trazirat embrionale të fraksionit në PS u shfaqën që me kundërshtimin e idesë së shprehur nga Nano se “programi i qeverisë duhet të jetë bibël për partinë”. Politikat ekonomike me karakter të djathtë që po zbaton qeveria e drejtuar nga Nano, duke mos u përputhur me karakterin e PS, si mbrojtëse e shtresave të paprivilegjuara kanë shkaktuar pakënaqësi të madhe në bazën e PS, e cila ashtu si pjesa më e madhe e popullit po vuan pasojat zbatimit të politikave të tilla ekonomike. Për këtë arsye, fraksionistët natyrisht duke luajtur me kartën e politikave sociale, ka shumë gjasa ta vënë në pozitë shumë të vështirë liderin e partisë. Për më tepër, kundërshtarët e Nanos kanë rastin të shfrytëzojnë edhe shkeljet statutore të bëra prej tij në përpjekje për të imponuar vijën e djathtë në parti pa përmendur mënyrat e kooptimit të njerëzve nga jashtë që nuk i kishte lidhur asgjë me partinë. Dhe, tani duke i servirur atij idenë e fraksionit, Pëllumbi dhe të tjerët kanë rastin të vënë në provë sinqeritetin e sloganeve të Nanos për “evropianizimin”, apo “demokratizimin” e partisë. Mënyra si do të reagojë ai ndaj fraksionit të kundërshtarëve të tij do të jetë “guri i provës” në këtë drejtim. Fakti që dalja hapur me idenë e fraksionit bëhet në prag të zgjedhjeve, ka shumë mundësi të komprometojë synimet e paralajmëruara të Nanos për të ndryshuar kreun lokal të PS. Nga ana tjetër, “bujaria” me aleatët e koalicionit lidhur me ndarjen e posteve përbën një tjetër motiv që baza e PS të anojë më tepër nga fraksioni “antiNano”. Në këtë aspekt nuk mund të mos ndikojë edhe shkarkimi i ministrave socialistë, disa prej të cilëve nuk janë pa ndikim në radhët e partisë. Po, ekzistenca e një fraksioni “të majtë” në gjirin e PS, ka rëndësi të madhe në një aspekt tjetër. Tani, pas legalizimit të Partisë Komuniste, ka gjasa të mëdha që pjesa e socialistëve që nuk pajtohen me politikat djathtas të Nanos dhe grupit të tij, të trokasin në dyert e partisë së Milloshit dhe Hasanit. Prandaj, një fraksion i pozicionuar majtas, në pozitat tradicionale të PS do të shërbente si një digë për të ...