Partitë politike takohen me delegacionin e KE-së, Lordin Finsberg, anëtar i Komisionit Politik dhe Columberg, Kryetar i Komisionit Juridik Delegacioni i raporterëve të KE-së mbërriti dje në mesditë në aeroportin e Rinasit për një vizitë tre ditore verifikuese në Shqipëri, gjatë së cilës do të shohin plotësimin e angazhimeve të marra nga Shqipëria në kuadrin e pranimit të saj në KE. “Ne kemi ardhur për të monitorizuar angazhimet e marra nga Shqipëria, që kur u bë anëtare e Këshillit të Evropës me porosi të sekretarit të përgjithshëm Z. Daniel Tarchys”, tha Lord Finsberg, anëtar i Komisionit Politik të KE. I pyetur, nëse ata mendonin se Shqipëria i ka plotësuar angazhimet e marra, ai iu përgjigj se; “do t’i përvijojmë kësi pyetjeje, pas përfundimit të misionit, gjatë të cilit do të takohemi me përfaqësues të partive politike, me qeveritarë, me organizata të të drejtave të njeriut dhe me Presidentin e Republikës, Z. Sali Berisha”. Shqipëria siguroi më 29 qershor aderimin në Këshillin e Evropës, duke u bërë kështu e 36-të anëtare i organizatës pan-europiane, të themeluar në vitin 1949 për të marrë në mbrojtje liritë e demokracisë dhe të drejtat e njeriut. “Unë jam për herë të pestë këtu, dhe jam i kënaqur që pata mundësinë për të ardhur sërish në Shqipëri. Shqipëria ka bërë hapa përpara në procesin e demokracisë, në ekonomi dhe në përmirësimin e gjendjes së jetesës”, tha zoti Columberg, anëtar-nënkryetar i Komisionit të Ligjeve dhe të Drejtave të Njeriut, i njohur në një nga personat që u treguan më të ashpër ndaj aderimit të Shqipërisë në Këshillin e Evropës. Delegacioni dje pasdite filloi takimet me drejtues të partive politike. Delegacioni i KE u takua me përfaqësuesit e Partisë Socialiste, Namik Dokle, Kurti Islami, Ethem Ruka, dhe Skënder Kote. Sot do të ketë një takim me përfaqësuesit e shtypit dhe të medias dhe më pas do të takohen me Kryetarin e Parlamentit Pjetër Arbnori dhe Presidentin e Republikës Sali Berisha. Anëtarët e Delegacionit të KE-së, Columberg dhe lordi Finsberg Në faqen 2-3: Qëndrimi i Partisë Socialiste dhe intervista me përfaqësuesit e Partisë Aleanca Demokratike, Social Demokrate, Bashkimi për të Drejtat e Njeriut, Partisë Demokratike