Publikohen në SHBA 168 faqe për situatën në Shqipëri Human Rights Watch dokumenton abuzimet e shumta pas ardhjes në pushtet të Berishës Eshtë shpërndarë të mërkurën në SHBA një raport i përgjithshëm për Shqipërinë i organizatës më të madhe amerikane për mbrojtjen e të drejtave të njeriut në botë, Human Rights Watch. Raporti prej 168 faqesh ndër të tjera, thekson kryesisht se qeveria e parë shqiptare postkomuniste dhunon sistematikisht të drejtat themelore civile e politike të shtetasve të saj. Human Rights dokumenton abuzimet e shumta në Shqipëri, të cilat kanë ndodhur që prej ardhjes në pushtet, në 1992, të qeverisë së Presidentit Sali Berisha. Duke e krahasuar gjendjen aktuale në Shqipëri me të kaluarën, raporti nënvizon se ka përparime. “Për dekada, thuhet në raport, Shqipëria ka qenë shteti më represiv dhe i mbyllur në të gjithë Europën Lindore”, dhe se çdo rezistencë ndaj sundimit të Enver Hoxhës ndëshkohej me internim, burgim afatgjatë dhe ekzekutime. “Nën dritën e kësaj të kaluare, Shqipëria ka bërë përparime në drejtim të respektimit të të drejtave civile e politike”, thuhet në raport. Por Human Rights shton se pesë vjet nuk kanë qenë të mjaftueshëm për të ç’rrënjosur trashëgiminë e sunduesit të Hoxhës. Raporti i gjatë për Shqipërinë shpjegon se “mungesa e plotë gjatë regjimit komunist i gjykatave të pavarura, medias së lirë dhe mekanizmave të drejtave të njeriut, paraqet një sfidë serioze për demokracinë shqiptare sot. Këa ështё më serioze, mentaliteti i një partie të vetme është ende i rrënjosur thellë në shumë prej liderëve të rinj të vendit. Ata që kritikojnë Partinë Demokratike në pushtet, shpesh konsiderohen si kritika të “demokracisë”. Duke analizuar këta faktorë, raporti nga SHBA thekson qytetarët shqiptarë janë ende të mbërthyer nga shkelje serioze të të drejtave të njeriut, të tilla si kufizime në lirinë e shprehjes dhe grumbullimit, manipulim të sistemit ligjor dhe dhunë nga ana e policisë. Human Rights thotë se këto abuzime pjesërisht janë rezultat i të kaluarës staliniste të Shqipërisë, por në shumicën e rasteve shkelja e të drejtave të njeriut në Shqipëri është rrjedhojë direkte e veprimeve specifike të qeverisë së re. Raporti në fjalë është hartuar në bazë të misioneve që kanë qëndruar për një kohë të gjatë në Shqipëri dhe dokumenton mjaft shkelje, përfshirë seksione të sistemit ligjor, lirisë së shtypit, abuzimet nga ana e policisë dhe të drejtat e minoriteteve. Ai rreshton një numër rekomandimesh drejtuar qeverisë së Berishës për të përmirësuar praktikat lidhur me të drejtat e njeriut. E.BARÇI