LARG TUTELES, POR ASNJËHERË JASHTË VËMENDJES Kureshti i parë për mjedisin universitar dhe studentin e porsaulur është normale. Mjaft pyetje e probleme të rëndësishme marrin përgjigje në këto ditë, kur në mjediset e shkollave të larta zhvillohet java e adaptimit të studentëve të rinj. Atyre u bëhen të njohura në mënyrë të përmbledhur veçoritë e fakulteteve, institutet ku do të ndjekin mësimet, mënyra e organizimit të procesit mësimor, e veprimtarisë shkencore, sportive e kulturore, mësojnë programin javor, oraret, njihen me pedagogët e grupit etj. Kjo në dukje e thjeshtë e me karakter njohës, java e adaptimit luan një rol më të thellë e me rëndësi për jetën studentore. Të qenit për herë të parë larg kujdesit të drejtpërdrejtë familjar, përballja me kërkesat e një jete më të pavarur, me ritmin e studimit universitar dhe me përgjegjësinë për formimin personal, janë sprova që duhen përballuar me mençuri e durim. Në këtë kuptim, puna edukative me studentët e vitit të parë nuk mund të kufizohet vetëm në disa ditë orientuese. Ajo duhet të vazhdojë gjatë gjithë vitit akademik, me një kujdes të veçantë nga pedagogët, organizatat e rinisë, drejtuesit e konvikteve dhe vetë kolektivat studentore. Shfaqje të neglizhencës, formalizmit apo të një tolerance të pajustifikuar ndaj shkeljeve të disiplinës, ndikojnë keq në formimin e studentit. Ndërkohë, një qëndrim korrekt, i ngrohtë, por kërkues, e ndihmon të riun të përshtatet më shpejt me jetën universitare. Ndaj studentit të ri duhet kujdes, por jo tutelë. Ai duhet të mësojë të ecë vetë, të vendosë vetë, të mbajë përgjegjësi vetë, por pa u ndjerë kurrë i lënë mënjanë apo jashtë vëmendjes së shoqërisë sonë. DIAGOGË ME PERSONALITET (Vijon në faqen 2)