Nga takimet e Presidentit Berisha me personalitetet e larta në Budapest Zot Kryetar, Zonja e zotërinj, Në emër të Shqipërisë përshëndes takimin e mbyllit të lartë të KSBE-së në Budapest. Shqipëria ka mbështetur dhe mbështet pa asnjë ekuivok procesin e Helsinkit, KSBE-në dhe shndërrimin e saj në Organizatë për Sigurim dhe Bashkëpunim në Evropë. Për ne, si vend i vogël, një organizëm i tillë i ngritur mbi parimet e barazisë së plotë, të respektimit të sovranitetit kombëtar të të gjitha vendeve anëtare, të mosndërhyrjes në punët e brendshme, ka qenë dhe mbetet një forum i pazëvendësueshëm për ndërtimin e një rendi të ri paqeje e sigurie në kontinentin tonë. Në mënyrë të veçantë, Shqipëria i është përmbajtur me besnikëri dhe i ka zbatuar me seriozitet dokumentet dhe angazhimet që burojnë prej këtij institucioni. Ne vlerësojmë shumë rolin pozitiv që ka luajtur KSBE-ja në parandalimin e konflikteve dhe në promovimin e të drejtave të njeriut dhe lirive themelore. Ne kemi bindjen se pa respektimin e plotë të këtyre parimeve nuk mund të ketë stabilitet të qëndrueshëm në Evropë. Shqipëria mbështet fuqimisht demokratizimin e marrëdhënieve ndërkombëtare dhe forcimin e mekanizmave për zgjidhjen paqësore të konflikteve. Vendi im ka kaluar një periudhë të vështirë tranzicioni, por ai ka arritur suksese të dukshme në ndërtimin e institucioneve demokratike, në ekonominë e tregut dhe në garantimin e lirive politike. Ne jemi të vendosur të vazhdojmë në këtë rrugë. Shqipëria është e interesuar drejtpërsëdrejti për paqen dhe stabilitetin në Ballkan. Ne besojmë se zgjidhja e të gjitha problemeve në rajon duhet të bëhet me mjete paqësore, me dialog dhe me respektimin e të drejtave të të gjithë popujve. Në këtë kuadër, dua të theksoj edhe njëherë rëndësinë e respektimit të të drejtave të shqiptarëve kudo që jetojnë, si faktor i rëndësishëm për stabilitetin dhe paqen në rajon. Shqipëria do të vazhdojë të japë kontributin e saj në proceset integruese evropiane dhe në bashkëpunimin rajonal. Ju faleminderit.