SHOKU RAMIZ ALIA PRITI SEKRETARIN E PËRGJITHSHËM TË OKB-SË HAVIER PEREZ DE KUELAR
Dje paradite kryetari i Presidiumit të Kuvendit Popullor të Republikës Popullore Socialiste të Shqipërisë shoku Ramiz Alia, priti në një takim z. Havier Perez de Kuelar, sekretar i përgjithshëm i Organizatës së Kombeve të Bashkuara, i cili ndodhet për një vizitë pune në vendin tonë. Në këtë takim shoku Ramiz Alia i shprehu z. Havier Perez de Kuelarit kënaqësinë për vizitën e tij në Shqipëri si sekretar i përgjithshëm i OKB-së. U bisedua rreth marrëdhënieve të Shqipërisë me Organizatën e Kombeve të Bashkuara dhe me institucione të tjera ndërkombëtare, çështjeve që kanë të bëjnë me vendosjen e paqes e të sigurisë në botë etj. Gjatë bisedës u shkëmbyen mendime rreth proceseve që zhvillohen sot në botë, problemeve që po përjeton njerëzimi në prag të mijëvjeçarit të tretë. Shoku Ramiz Alia tha se Shqipëria po e ndjek me vëmendje dhe me interes zhvillimin e ngjarjeve në botë dhe në mënyrë të veçantë të atyre në Evropë, ku po bëhen përpjekje për të gjetur rrugë për shmangien e konfrontimit, për zgjidhjen e problemeve me mirëkuptim e dialog, për forcimin e bashkëpunimit dhe të sigurisë, në përputhje me interesat e çdo populli e të mbarë njerëzimit. Lidhur me zhvillimet që po ndodhin në vendet e Evropës Lindore, shoku Ramiz Alia tha se ato paraqesin një interes të veçantë si për popujt e vetë këtyre vendeve, ashtu edhe për gjithë Evropën e më gjerë. Kombet e këtyre vendeve kanë hyrë në procese ndryshimesh me synimin e qartë të krijimit të kushteve më të përshtatshme për përparimin ekonomik e social dhe forcimin e lirisë e të demokracisë, por çdo gjë duhet vlerësuar me kujdes e pjekuri, pa u nxituar, sepse liria, demokracia dhe përparimi nuk mund të importohen si mall. Ato duhet të fitohen me përpjekje të mençura e këmbëngulëse të vetë popujve. Ngjarjet duhet të orientohen në shina të tilla, që t’u shërbejnë interesave të njerëzve të thjeshtë, të rritjes së mirëqenies së tyre, dhe jo të thellojnë dallimet sociale e të krijojnë trazira e paqëndrueshmëri. Shoku Ramiz Alia i tha gjithashtu sekretarit të përgjithshëm të OKB-së se vendi ynë është i interesuar që procesi i bashkëpunimit dhe i integrimit të vendeve evropiane të zhvillohet në rrugë normale. Ne e konsiderojmë me rëndësi që Evropa të ngrihet si një kontinent paqësor, me popuj të lirë e me respekt reciprok, të drejtash të barabarta, i lirë nga dallimet e sistemit, nga baza e armët bërthamore dhe nga çfarëdo lloj hegjemonizmi. Përsa u përket raporteve të shtetit tonë me vendet fqinjë, ne vlerësojmë se ekzistojnë të gjitha mundësitë për t’i zgjeruar këto marrëdhënie në interes të një klime më të mirë mirëkuptimi në Ballkan. Udhëheqësi shqiptar theksoi se politika e jashtme e vendit tonë mbetet e pandryshuar: marrëdhënie miqësore me të gjithë mbi bazën e barazisë, të respektit reciprok, të mosndërhyrjes në punët e brendshme dhe të leverdisë së ndërsjellë. Z. Havier Perez de Kuelar tha se vendi ynë po i ndjek me interes zhvillimet në Shqipëri dhe shprehu dëshirën që vendi ynë të zgjerojë kontaktet me organizmat e OKB-së dhe me vendet e tjera. Ai vlerësoi rolin që mund të luajë Shqipëria në Ballkan dhe në Evropë. Gjatë pritjes u fol edhe për Kosovën dhe për gjendjen e shqiptarëve në Jugosllavi. Shoku Ramiz Alia vuri në dukje se problemi i Kosovës duhet të zgjidhet në rrugë politike, me dialog dhe me respektimin e të drejtave legjitime të popullsisë shqiptare atje. Biseda u zhvillua në një atmosferë të përzemërt dhe miqësore.