THIRRJE E KOMITETIT QENDROR TË PARTISË SË PUNËS TË SHQIPËRISË Shokë dhe shoqe, vëllezër dhe motra, Në këtë periudhë të vështirë e të trazuar që po kalon atdheu ynë, po ju drejtohemi me këtë thirrje, të preokupuar në mënyrë të veçantë e me përgjegjësi të lartë për fatet e Shqipërisë, për ruajtjen e rendit kushtetues, të qetësisë e të stabilitetit, të fitoreve të socializmit, të lirisë e të pavarësisë së atdheut tonë. Shqipëria po kalon ditë të vështira. Po bëhen përpjekje të shumta për ta destabilizuar gjendjen, për të dëmtuar jetën ekonomike e shoqërore të vendit, për të penguar punën dhe prodhimin, për të nxitur konflikte e përçarje, për të krijuar klimë pasigurie e paniku. Partia e Punës e Shqipërisë dhe shteti ynë socialist u kanë bërë dhe po u bëjnë thirrje të gjitha forcave politike e shoqërore, të gjithë qytetarëve të vendit, që të kontribuojnë për ruajtjen e rendit, për qetësinë dhe për vazhdimin normal të jetës e të punës. Në këto momente, mbi të gjitha duhet të mbizotërojnë maturia, përgjegjësia dhe ndjenja e lartë kombëtare. Ne jemi të bindur se populli shqiptar, klasa punëtore, kooperativistët, rinia, inteligjencia dhe të gjitha shtresat e ndershme të vendit, do të tregojnë pjekuri politike, do të mbrojnë me vendosmëri fitoret e revolucionit dhe të socializmit, do të mbrojnë rendin kushtetues dhe interesat e larta të kombit. U bëjmë thirrje të gjithë komunistëve, punëtorëve, fshatarëve, ushtarakëve, studentëve, nxënësve, grave e burrave të Shqipërisë, të qëndrojnë të bashkuar, të mos bien pre e provokimeve, të mos lejojnë shkatërrimin e pasurisë së përbashkët dhe të ruajnë me çdo kusht qetësinë publike. Partia e Punës e Shqipërisë do të vazhdojë të mbrojë me vendosmëri interesat e popullit, pavarësinë kombëtare, rendin demokratik-popullor dhe rrugën e zgjedhur nga populli ynë. KOMITETI QENDROR I PARTISË SË PUNËS TË SHQIPËRISË