Më datën 23 mars 1991, nën drejtimin e sekretarit të parë të KQ të PPSH shokut Ramiz Alia, u zhvillua në Tiranë Konferenca Kombëtare e Partisë së Punës të Shqipërisë e sekretarëve të parë të komiteteve të partisë në rrethe dhe të sekretarëve të komiteteve të PPSH dhe të sekretarëve të komiteteve të partisë në repartet ushtarake, ku u shqyrtua gjendja para zgjedhjeve të 31 marsit. 1. Aktivi kombëtar vlerësoi rëndësinë përcaktuese që kanë për propagandimin e fjalës së fundit elektorale të PPSH dhe të kandidatit të saj për deputet të Kuvendit Popullor në ditët e mbetura para votimit. Në këtë kuadër duhet të punohet në mënyrë më të kualifikuar, më të organizuar e më të ngjeshur, për t’ia bërë sa më të qartë popullit, se fitorja e PPSH-së dhe e kandidatëve të saj është në interesat më të larta të vendit dhe të ardhmes së tij. Aktivi shtroi si detyrë të domosdoshme, që në fillim të korrigjoheshin të metat e propagandës së deritanishme, ku forca e argumentit, puna me njerëzit, siç u vu në dukje në shumë diskutime dhe në fjalën përmbyllëse të shokut Ramiz Alia, ka qenë përgjithësisht e dobët. Shokët duhet të zbresin me këmbë në tokë, të shkojnë te njerëzit, të flasin me gjuhën e argumentit, me qëndrime të drejta e të sinqerta, t’u shpjegojnë se forca e PPSH-së qëndron në programin e saj, në qëllimet dhe idealet që mbron, në alternativën që paraqet për të sotmen dhe për të ardhmen. Ata duhet të bindin, se ekzistenca e një force të madhe politike, si partia jonë, me atë përbërje shoqërore që ka, është një faktor i rëndësishëm për demokracinë, për stabilitetin e vendit dhe ecjen e tij përpara. Partia e Punës është jo vetëm një forcë politike, por një realitet i madh shoqëror. Pa të nuk mund të zgjidhen me sukses problemet e shumta që janë krijuar. Shokët duhet të flasin me gjuhën e së vërtetës, pa bërë premtime të gënjeshtërta, duke i shpjeguar popullit të gjithë gjendjen e vështirë dhe sakrificat që do të duhen për të kaluar këtë periudhë, por njëkohësisht të theksojnë se kemi mundësitë dhe rrugët për ta kapërcyer atë. 2. Aktivi kombëtar i Partisë vendosi se me mbarimin e afatit ligjor për fushatën zgjedhore të ditës së sotme, duhet të merren masa që të bëhet i qartë ndalimi i çdo veprimtarie partiake e elektorale. Që nga ky moment nuk lejohet më asnjë miting, takim, autokolonë e çfarëdo forme tjetër veprimtarie elektorale. Organeve kompetente u rekomandua të marrin masa të nevojshme për zbatimin rigoroz të këtij vendimi. Partia nuk duhet t’u japë shkak kundërshtarëve të bëjnë interpretime të shtrembëruara. Shokët e partisë duhet të jenë shembull i korrektesës në respektimin e rregullave të lojës demokratike. 3. Aktivi kombëtar theksoi se komisionerët dhe vëzhguesit e PPSH-së duhet të jenë në krye të detyrës, të përgatitur mirë politikisht, të pjekur, me përgjegjësi dhe me kulturë ligjore, për të siguruar ecurinë normale të zgjedhjeve, për të mos lejuar asnjë shkelje të ligjit dhe për të mbrojtur me vendosmëri votën e lirë të popullit. Komisionerët dhe vëzhguesit duhet të jenë në gjendje të shpjegojnë qetësisht çdo problem që del në qendrat e votimit, duke kërkuar zgjidhje ligjore dhe të drejtë. 4. Aktivi kombëtar i Partisë ritheksoi rëndësinë e ruajtjes së qetësisë, të rendit dhe të disiplinës shoqërore gjatë ditës së zgjedhjeve dhe pas shpalljes së rezultateve. Të gjithë komunistët dhe njerëzit e ndershëm duhet të tregojnë pjekuri, vetëpërmbajtje e qytetari, të mos bien pre e provokimeve, të mos përfshihen në konflikte dhe të kontribuojnë që procesi të zhvillohet normalisht. Në emër të shokut Ramiz Alia: AFTIVI KOMBËTAR I PPSH