Janë të fundi përfundoi takimi i djeshëm në mes Kryetarit të Partisë Socialiste, z. Fatos Nano, me drejtuesit e partive opozitare për gjendjen alarmante që është krijuar në vend. Në këtë takim u diskutua ecuria e ngjarjeve, që nga demonstrata e qytetarëve shkodranë e deri tek përleshja e përgjakshme e policisë me banorët e qytetit të Lezhës e në mënyrë të veçantë ndaj ngjarjeve të djeshme në Fier. Në këtë takim është rënë dakord që forcat politike opozitare t'i drejtohen me një peticion Parlamentit, Presidentit të Republikës si dhe Këshillit të Ministrave, ku të shprehet protesta ndaj dhunës policore të ushtruar sistematikisht ndaj manifestimeve paqësore të qytetarëve. Në peticion do të kërkohet dorëheqja e ministrit të Brendshëm. Po kështu, do të kërkohet edhe krijimi i një komisioni hetimor parlamentar, me përfaqësues të forcave politike opozitare, për të hedhur dritë mbi ngjarjet e fundit në Shkodër, Lezhë e Fier. Sot paradite, përfaqësues të partive opozitare do të zhvillojnë një takim të zgjeruar për të koordinuar qëndrimin e tyre të përbashkët dhe për të përcaktuar hapat e mëtejshëm.