- Kryetari i PS FATOS NANO takohet me banorë të qytetit të Fushë-Krujës - Njëzet e pesë vajza kërkojnë të pranohen në Partinë Socialiste - Policia e rrethit në Fushë Krujë kryen me korrektësi detyrën - Televizioni i njohur për këtë takim nuk merr pjesë Dje në orën 10 komiteti drejtues i Partisë Socialiste të rrethit të Krujës e kishte caktuar takimin me banorët e Fushë-Krujës në qendër të qytetit. Për arsye sigurie nga koha e paqëndrueshme në minutën e fundit, takimi u vendos që të bëhej në Pallatin e Kulturës. Kështu ishte lajmëruar dhe populli. Ai u gjend në vendin e caktuar, por mjaft forca policore si dhe shërbimi sekret qëndronin me makinën në sheshin para pallatit dhe nuk lejonin që të hapej dera. Në hyrjen e rrugës së Fushë-Krujës, si dhe në çdo kryqëzim, që të çon në qytet, rrugët automobilistike ishin zënë nga forca policore. Kishte ardhur në qendër edhe i deleguari i Presidentit, A. Veliu, por në vend që të ndihmonte për mbarëvajtjen e takimit, u bë pengues për realizimin e tij. Lidhur me këtë veprim absurd e antinjerëzor, drejtuesit e komitetit të PS të rrethit bënë të gjitha përpjekjet dhe i propozuan atij që në rast se i druheshin pjesëmarrjes së madhe të popullit në qendër, mitingu të bëhej në sallën e Pallatit të Kulturës. Por ai u përgjigj se nuk kishte ardhur me atë mision, por për të bllokuar çdo veprimtari elektorale të opozitës. Më në fund, pas presionit të vazhdueshëm, u hap dera e pallatit dhe filloi tubimi. Kryetari i Partisë Socialiste, Fatos Nano, në fjalën e tij u ndal në rrugët e daljes nga kriza dhe në alternativën e socialistëve për ripërtëritjen e vendit. Ai theksoi se opozita ka paraqitur kërkesat e saj të arsyeshme për ndryshimin e kursit të qeverisjes, për respektimin e të drejtave politike e qytetare, për depolitizimin e administratës dhe të policisë, për zgjedhje të lira e të ndershme. Nano tha se nëse qeveria nuk reflekton ndaj këtyre kërkesave, vendi shkon drejt një zgjidhjeje të re politike. Ai vuri në dukje se papunësia, varfëria, mungesa e rendit dhe e sigurisë, si dhe presioni ndaj opozitës, po e çojnë vendin në rrugë pa krye. Pjesëmarrësit e pritën me duartrokitje të forta dhe me brohoritje fjalën e tij. Në takim folën edhe shumë banorë të qytetit, punëtorë, pensionistë, mësues dhe të rinj, të cilët denoncuan gjendjen e vështirë ekonomike, rritjen e çmimeve, mungesën e punës dhe trysninë që ushtrohet mbi qytetarët për shkak të bindjeve politike. Njëzet e pesë vajza të reja paraqitën kërkesën për t'u pranuar në Partinë Socialiste, gjë që u prit me entuziazëm nga të pranishmit. U vlerësua korrektësia e policisë së rrethit, e cila në momentin e zhvillimit të takimit kreu detyrën pa provokime. Për këtë takim, televizioni nuk mori pjesë. (Vijon në faqen 2)