SHQETËSIM DHE KËRKESË E DREJTË PËR ZGJIDHJEN E “ÇËSHTJES NANO”
Rezoluta e Këshillit Ndërqeveritar Italo-Arbëresh për përshpejtimin e lirimit të Fatos Nanos
Në ditët e fundit po bëhet gjithnjë e më e gjerë dhe më e organizuar lëvizja për lirimin e Fatos Nanos. Asaj po i shtohen zëra dhe organizma të ndryshme nga Shqipëria dhe nga jashtë vendit.
Më 17 shtator, Këshilli Ndërqeveritar Italo-Arbëresh, me seli në Kozencë të Italisë, miratoi rezolutën me anë të së cilës kërkohet lirimi i menjëhershëm i Fatos Nanos. Në këtë rezolutë thuhet se “presidenti i Partisë Socialiste të Shqipërisë është marrë peng nga klika berishiane në pushtet”. Ndërsa i bëhet thirrje Qeverisë italiane, deputetëve dhe senatorëve të saj, Komunitetit Europian, Këshillit të Europës dhe OSBE-së “të ndërhyjnë pranë Qeverisë shqiptare për lirimin e menjëhershëm të Fatos Nanos”.
Që prej fillimit të burgosjes së padrejtë të Fatos Nanos, ne kemi kërkuar që ajo të marrë fund sa më parë. Jemi shprehur se arrestimi dhe mbajtja në burg e tij nuk ka qenë çështje drejtësie, por çështje politike. Kjo po bëhet gjithnjë e më e qartë edhe për opinionin publik vendas e të huaj.
Lirimi i tij do të ishte një hap i domosdoshëm për rivendosjen e klimës së besimit, për respektimin e lirive dhe të drejtave politike dhe për shmangien e përkeqësimit të mëtejshëm të jetës politike në vend.
Partia Socialiste e Shqipërisë e vlerëson këtë rezolutë si një mbështetje të rëndësishme në përpjekjet e saj për të vënë në vend të drejtën dhe për të dalë nga një situatë e papranueshme politike.
Përkthim jo i plotë nga teksti i dukshëm në faqe[?]