Servet Pëllumbi : 1. Partia Socialiste do të luftojë deri në fund përpjekjet për përçarjen e popullit "jug e veri" 2. Populli pret ndryshimin e qeverisjes dhe jo deklarata për koalicione imagjinare 3. Dëshirojmë veprime konkrete të qeverisë për normalizimin dhe forcimin e marrëdhënieve me vendet fqinjë Aktivi i zgjeruar i socialistëve të Sarandës, me pjesëmarrjen e kryetarit të PS Servet Pëllumbi e mbylli veprimtarinë e javës kundër projektkushtetutës antipopullore. Aktivistët iu kundërvunë me forcë përpjekjeve të pushtetit për të përçarë popullin e për ta ndarë atë artificialisht në veri e jug. Askush e asgjë nuk mund ta mashtrojë e ta tjetërsojë vullnetin e shumicës dërrmuese të popullit të Shqipërisë. Këtë e dëshmoi më së miri pjesëmarrja e madhe në tubimin e organizuar dje në Sarandë, ku morën pjesë edhe përfaqësues nga të gjitha fshatrat e rrethit. Akuzat që i bëhen opozitës socialiste dhe veçanërisht Partisë Socialiste, si nxitëse e një lufte civile me shtresat më të varfra e më të varfëruara të vendit janë absurde e qesharake. Kështu u shpreh Servet Pëllumbi në takimin me elektoratin e Sarandës. Ai tha se varfëria ekziston vërtet dhe kjo vihet re me sy të lirë. Ajo i ka rrënjët te kjo qeveri e paaftë dhe kjo politikë e mbrapshtë e cila ka ndjekur gjithnjë vijën e denigrimit dhe nëpërkëmbjes së opozitës socialiste. Përgjegjësia kryesore e institucioneve qeveritare është të marrin masa për zbutjen e saj, të krijojnë sa më shumë vende pune dhe të mos i përzënë nga puna ata që i mbanin familjet e tyre me djersën e ballit. Duke iu drejtuar socialistëve të Sarandës, z. Pëllumbi tha se tashmë opozita është e vendosur në aksionin e saj politik për t'iu kundërvënë me vendosmëri këtij regjimi, duke bërë maksimumin e saj për të mos lejuar degjenerimin e situatës. Në këtë kuadër, ai i bëri të qartë popullit se PS nuk ndjek dhe nuk do të ndjekë kurrë rrugën e dhunës, përkundrazi do të kontribuojë në çdo rast për mirëkuptim e qetësi në njerëz me qëllim që t'i lihet sa më pak vend dhunës e konflikteve. Pasi përshëndeti qendrimin e matur e të përgjegjshëm të elektoratit të Sarandës në përballimin e provokimeve politike që i janë bërë gjatë këtyre ditëve, z. Pëllumbi theksoi se Partia Socialiste do të luftojë deri në fund përpjekjet e qeverisë dhe të forcave të tjera ekstremiste për përçarjen e popullit në "jug e veri", duke i quajtur ato përpjekje të mbrapshta e të dëmshme për të ardhmen e Shqipërisë. Ai kërkoi angazhimin e të gjithë shqiptarëve në rrugën e bashkimit kombëtar dhe të kapërcimit të gjendjes së vështirë ekonomike e politike. Më tej z. Pëllumbi u shpreh se qeverisja duhet të ndryshojë, pasi shumica e shqiptarëve e ka humbur shpresën te administrata e sotme. Duke folur për ftesat e herëpashershme për koalicione që vijnë nga pushteti, z. Pëllumbi tha se populli pret ndryshimin e qeverisjes dhe jo deklarata për koalicione imagjinare, që s'kanë lidhje me realitetin. Shqipëria ka nevojë për përgjegjësi, stabilitet dhe institucione që funksionojnë për qytetarin. Në fund ai theksoi nevojën për një politikë të jashtme më të qartë e më aktive, duke kërkuar veprime konkrete të qeverisë për normalizimin dhe forcimin e marrëdhënieve me vendet fqinjë.