Dje panikë kryetarët e PSSH-së të qarkut të Vlorës, në një takim me veteranë, invalidë, familje dëshmorësh dhe ish të përndjekur politikë, zhvilluar në mjediset e Muzeut Historik TIRANË Në kuadrin e përpjekjeve për intensifikimin e veprimtarisë politike e shoqërore në prag të zgjedhjeve lokale të 26 majit, Partia Socialiste e Shqipërisë ka bërë dje në Tiranë një takim me veteranë, invalidë, familje dëshmorësh dhe ish të përndjekur politikë. Në këtë veprimtari kanë marrë pjesë dhe kryetari i PSSH-së, z. Servet Pëllumbi, sekretari i përgjithshëm i kësaj partie, z. Rexhep Meidani, sekretarja për problemet e politikës sociale, znj. Vito Kapo, drejtues të Forumit Rinor të PS-së dhe përfaqësues të tjerë të partisë. Pasi bëri një vështrim të shkurtër mbi situatën politike dhe ekonomike, z. Servet Pëllumbi tha se liria, pavarësia, paqja dhe demokracia nuk mund të jenë shprehje të vërteta të idealit njerëzor pa siguruar mirëqenie e drejtësi shoqërore. Duke bërë një vlerësim të periudhës së tranzicionit, ai u shpreh se ende nuk janë kapërcyer disa pasoja të së kaluarës. Qëndrime të tilla duken në pengesat që i bëhen popullit shqiptar për të gëzuar jetën e lirë e të denjë, siç është stërzgjatja e krizës së pronës, e problemit të tokës dhe e papunësisë, pra probleme që vazhdojnë të shqetësojnë shumë familje shqiptare. Ai theksoi se demokracia nuk mund të jetë vetëm një votë në katër vjet, por pjesëmarrje aktive dhe përgjegjësi qytetare në jetën e vendit. Në këtë kuadër kërkohet një solidaritet i gjerë shoqëror dhe respekt për sakrificat e atyre që dhanë jetën për lirinë e vendit. Në fjalën e vet z. Pëllumbi vuri në dukje gjithashtu nevojën për një bashkëpunim më të mirë mes brezave, për ruajtjen e vlerave të antifashizmit dhe për vendosjen e një klime tolerance e mirëkuptimi. Ai tha se pluralizmi nuk duhet të shndërrohet në armiqësi, por në garë qytetare idesh dhe programesh. Në këtë kuptim, ai nënvizoi se vendi ka nevojë për stabilitet, punë dhe shtet ligjor. Në takim folën edhe përfaqësues të veteranëve, të invalidëve, të familjeve të dëshmorëve dhe të ish të përndjekurve politikë, të cilët shprehën shqetësimet e tyre për trajtimin ekonomik e shoqëror, për njohjen e kontributeve dhe për përmirësimin e legjislacionit që lidhet me statusin e tyre. U kërkua më shumë vëmendje nga institucionet shtetërore dhe një trajtim më i denjë për këto shtresa. Korresp. i Zërit të popullit.