Mbledhje e jashtëzakonëshme e kryesisë së Partisë Socialiste dhe kryesisë së gazetës “Zëri i Popullit” Anëtarë të kryesisë dhe gazetarë të “Zërit të Popullit” dje në mbrëmje zhvilluan një mbledhje të jashtëzakonshme, pas skandalit të ndodhur me numrin e djeshëm të “Zërit të Popullit”, i cili u censurua barbarisht nga policia dhe mercenarë të pushtetit. Duke e cilësuar këtë akt të paprecedent si një agresion politik ndaj opozitës dhe shtypit të lirë, kryesia e PS dhe kolektivi i “Zërit...” e cilësuan atë si një alarm të madh për demokracinë shqiptare. Ata i kërkuan opinionit publik të reagojë energjikisht dhe ta dënojë këtë akt arbitrar, anti-ligjor e anti-kushtetues. Kryesia e Partisë Socialiste deklaron se ky akt ndodh në prag të zgjedhjeve dhe ka për qëllim të frikësojë shtypin opozitar dhe të mbyllë gojën e së vërtetës. Sipas fjalës së pjesëmarrësve, përgjegjësit e këtij skandali duhet të dalin para ligjit dhe para opinionit. U theksua se gazetës i është bërë një padrejtësi e rëndë dhe se kjo dëshmon gjendjen dramatike të lirisë së shprehjes në vend. Pjesëmarrësit u shprehën të vendosur që “Zëri i Popullit” të vazhdojë misionin e tij informues dhe denoncues. U bë thirrje për solidaritet me gazetarët dhe me shtypin e pavarur. Në përfundim, mbledhja miratoi një deklaratë proteste dhe kërkoi zbardhjen e menjëhershme të ngjarjes.[?]